Les obres, práuticamente finaes y a falta de los últimos detalles, supunxeron una inversión de 547.000 euros.
MIERES, 4 de SETIEMBRE de 2025.- L’Ayuntamientu de Mieres, al traviés de les conceyalíes de Desendolcu Urbanu Sostenible y Deportes que dirixen Marta Jiménez y César Menéndez respeutivamente, informa de que les obres de la tercer fase de la Ciudá del Tenis de La Riquela tán yá práuticamente finaes y que nestos momentos trabáyase nel remate d’esta importante actuación que supunxo una inversión de 547.000 euros.
Esti proyectu permitió la construcción de dos pistes de tenis de tierra batida, les primeres de les cuenques mineres, amás d’otres obres complementaries como la urbanización de la zona o la construcción d’una instalación que sirva d’almacén de tierres pa’l caltenimientu d’estes pistes.
Esta actuación ta financiada al traviés del Institutu pa la Transición Xusta con fondos del Plan de Recuperación, Tresformación y Resiliencia (PRTR) y supón siguir avanzando nel oxetivu del Gobiernu local d’ufrir meyores instalaciones y servicios pa la práutica deportiva nel conceyu. Un camín nel que se vien trabayando de manera continua nos caberos años con inversiones constantes en infraestructures, equipamientos y maquinaria. Nesti sen, hai qu’estacar que Mieres tien en marcha 5 millones d’euros n’inversiones deportives y, nesti marcu, proyectos como esti o como la reforma integral del polideportivu d’Oñón supón siguir ameyorando y ampliando la ufierta d’equipamientos nun ámbitu tan importante como’l deporte pa la calidá de vida y la salú.
Fuente: Ayto de Mieres.
About The Author
